उत्तरपश्चिमी चीनको एक सिनेमा हलले दिवा निद्राका लागि अनौठो सेवा शुरू गरेको छ । ब्रेकको समयमा आराम गर्न सहज होस् भनेर सिनेमाले सिटहरूलाई पूर्ण रूपमा पछाडि ढल्काएर सुत्न मिल्ने फ्ल्याट सिटको व्यवस्था गरेको हो । 

चिनियाँ सञ्चारमाध्यम साय चाइना मोर्निङ पोस्टका अनुसार शान्सी प्रान्तको सियानस्थित 'लुमियाई सिनेमा'मा सञ्चालन गरिएको यो योजना गत वर्षको अप्रिलदेखि नै कार्यान्वयनमा आएको हो ।

कार्यालयका कर्मचारी तथा अन्य ग्राहकहरूलाई लक्षित गरी ल्याइएको योजनाअनुसार सिंगल सदस्यताका लागि ३९.९ युआन र जोडीपासका लागि ५९.९ युआन मासिक शुल्क तोकिएको छ । यो मासिक सदस्यता लिने ग्राहकहरूले कुनै पनि कार्यदिनमा सिनेमा हलका दुईवटा विशेष रूपमा छुट्याइएका स्क्रिनिङ हलमा आरामदायी निद्राको आनन्द लिन सक्नेछन्।

सिनेमा हलकी व्यवस्थापक सुका अनुसार सप्ताहकार्यका दिनहरूमा दर्शकहरूको उपस्थिति कम हुने हुँदा हलको अकुपेन्सी रेट बढाउन र व्यापारलाई गति दिन यो दिवा निद्रा सेवा शुरू गरिएको हो।

सिनेमाले ७६ वटा समायोजन गर्न मिल्ने सिटहरू भएको दुईवटा हललाई यसका लागि छुट्याएको छ। यी सिटहरूलाई पूर्ण रूपमा सम्याएर सुत्न मिल्छ, जहाँ ग्राहकहरूले दिउँसो १२ बजेदेखि २:३० बजेसम्म आराम गर्न सक्छन्।

आरामका लागि हलमा निःशुल्क कम्बल, कफी तथा अन्य पेय पदार्थहरूको व्यवस्था गरिएको छ।

डिस्पोजेबल इयरप्लग र आँखामा लगाउने मास्क भने प्रतिगोटा ५.९ युआन तिरेर लिन सकिने व्यवस्था छ।

वातावरणलाई शान्त र व्यवस्थित राख्न केही विशेष नियमहरू पनि बनाइएको छ। ग्राहकहरूले आफ्नो मोबाइल फोन साइलेन्ट गर्नुपर्छ भने कसैलाई फोन गर्न वा उठाउन परेमा सुत्ने क्षेत्र बाहिर जानुपर्छ। साथै, सुत्ने ठाउँमा सफा र रमाइलो वातावरण कायम राख्न ग्राहकहरूले जुत्ता भने खोलेर राख्नुपर्ने नियम छैन ।

अधिकांश सिटहरू 'लेजर स्क्रिनिङ हल'मा राखिएका छन्, जुन सुत्न फराकिला सिटहरू भएका कारण ग्राहकहरूबीच धेरै लोकप्रिय छ। अर्को भेन्यु 'मसाज सिट हल' हो, जहाँ फ्ल्याट गर्न मिल्ने मसाज कुर्सीहरू राखिएका छन्। यदि कुनै ग्राहक चर्को स्वरमा घुर्ने खालका छन् भने, हलका कर्मचारीहरूले उनीहरूलाई सिटहरू केही साघुँरो भएको तर कम मानिसहरू आराम गर्ने 'मसाज सिट हल' मा जान विनम्रतापूर्वक सुझाव दिने गर्छन्।

चीनमा दिउँसोको समयमा पावर न्याप (दिवा निद्रा) लिने चलन निकै प्रचलित छ, जुन स्वास्थ्यका लागि पनि लाभदायक मानिन्छ।