२३ भदौ २०८३, मंगलबार
काठमाडौंको कागेश्वरी मनोहरा नगरपालिकाका इन्जिनियर दीपा कार्की ६४ हजार घुससहित पक्राउ परेकी छन् । उनीसँगै मध्यस्थताको भूमिका निभाउने आस्मा कार्की पनि पक्राउ परेकी छन् ।
नगरपालिकाको भवन निर्माण तथा वस्ती विकास शाखा प्रमुख इन्जिनियर (सातौं) पदमा कार्यरत कार्कीले स्ट्रक्चर एनालाइसिसको काम स्वीकृत गरेबापत सेवाग्राहीलाई पटक-पटक दु:ख हैरानी दिएर घुस मागेको अख्तियार दुरुपयोग अनुसन्धान आयोगले जनाएको छ ।
पीडित पक्षले दिएको उजुरीको आधारमा आयोगको केन्द्रीय कार्यालय टंगालबाट खटिएको टोलीले दीपा र आस्मालाई ६४ हजार घुससहित पक्राउ पक्राउ गरेको प्रवक्ता सुरेश न्यौपानेले जानकारी दिए ।
उनीहरूलाई कागेश्वरी मनोहरा नगरपालिकाको कार्यालय थली, डाँछीबाट सोमबार नियन्त्रणमा लिइएको र मंगलबार विशेष अदालतबाट म्याद थप भई अनुसन्धान प्रक्रिया अगाडि बढाइएको प्रवक्ता न्यौपानेले बताए ।
