युरोपियन ट्रान्सफर विन्डोको अन्तिम दिन चेल्सीका मिडफिल्डर एन्जो फर्नान्डेज कीर्तिमानी ट्रान्सफर शुल्कमा म्यानचेस्टर सिटीमा अनुबन्धित भएका छन्। सम्झौतासँगै म्यानचेस्टर सिटीले कुनै पनि खेलाडीका लागि ब्रिटिस ट्रान्सफर शुल्कको कीर्तिमानी रेकर्ड बराबरी गरेको छ।

हालै सम्पन्न २०२६ को विश्वकपको फाइनलसम्म पुगेको अर्जेन्टिनाको राष्ट्रिय टोलीका सदस्य २५ वर्षीय फर्नान्डेज लामो समयदेखि स्टामफोर्ड ब्रिज छोड्ने चर्चामा थिए। मंगलबार राति समाप्त भएको ग्रिष्मकालीन ट्रान्सफर विन्डोको अन्तिम केही मिनेट बाँकी रहँदा यो ठूलो सम्झौता टुङ्गिएको थियो।

सिटीले सामाजिक सञ्जाल प्लेटफर्म 'एक्स' मा एक भिडियोमार्फत सम्झौताको पुष्टि गरेको छ। यो ट्रान्सफर शुल्क लिभरपूलले न्युकासलबाट अक्जेन्डर इसाकलाई भित्र्याउन तिरेको १२ करोड ५० लाख पाउन्ड (करिब १६ करोड ९० लाख अमेरिकी डलर) को ब्रिटिस कीर्तिमानी रकमसँग बराबर छ।

विन्डो बन्द हुनुभन्दा केही घण्टाअघि नै दुई क्लबबीच सहमति जुटिसकेजस्तो देखिएको थियो, जसले खेलाडीलाई मेडिकल परीक्षण गराउने समय दियो, तर अन्तिम समयमा आएर सम्झौता हुनेमा केही शंकाहरू पनि उब्जिएका थिए।

ट्रान्सफर विन्डो बन्द हुनुअघि फर्नान्डेजले आफ्ना इन्स्टाग्राम पेजमार्फत चेल्सीका फ्यानहरूलाई बिदाइ सन्देश दिएका थिए। उनले लेखेका थिए, 'म चाहन्छु कि तपाईंहरूलाई यो थाहा होस् कि यी दिनहरू मेरा लागि सजिलो थिएनन्। यो लेख्न पनि सजिलो छैन। सत्य यो हो कि म राम्रो स्थितिमा थिइनँ। तीन वर्षअघि कोबहम र स्टामफोर्ड ब्रिज मेरो र मेरो परिवारको घर बनेका थिए। मैले यहाँ पाइला टेकेको पहिलो दिनदेखि नै यो क्लबको इतिहासले सुहाउने हरेक ट्रफी जिताउन म तल्लीन थिएँ, यो कुरामा मलाई विश्वास गर्नुहोस्।'

फर्नान्डेज चेल्सीको सोही टोलीमा थिए- जसले २०२५ मा युइएफए कन्फ्रेन्स लिग जितेको थियो र त्यसपछि विस्तारित फिफा क्लब विश्वकपको उपाधि पनि आफ्नो नाममा पारेको थियो।

यो २५ वर्षीय खेलाडीले अब ३० करोड पाउन्ड (४० करोड ५४ लाख डलर) भन्दा बढीको लागतमा तयार पारिएको सिटीको नयाँ सेन्ट्रल मिडफिल्डमा इङ्गल्यान्डका अन्तर्राष्ट्रिय खेलाडी इलियट एन्डरसन र मोरक्कोका अय्युब बौआद्लीसँग साझेदारी गर्नेछन्।

सन् २०२३ मा बेन्फिकाबाट १० करोड ६० लाख पाउन्डमा चेल्सीमा आबद्ध भएका फर्नान्डेजले गत सिजन रियल मड्रिडमा जाने इच्छा व्यक्त गरेर ब्लुजलाई रुष्ट बनाएका थिए, जसको कारण उनले दुईवटा म्याच गुमाउनुपरेको थियो।

अर्जेन्टिनाको विश्वकप यात्रामा उनले दुई गोल गरेका थिए, जसमा सेमिफाइनलमा इङ्गल्यान्डविरुद्धको उत्कृष्ट गोल पनि सामेल छ। तर, फाइनलमा उनी रातो कार्ड खाएर मैदान बाहिरिनुपरेको थियो भने अर्जेन्टिना फाइनलमा १–० गोलले पराजित हुँदै विश्वविजेताको ताज जोगाउन असफल भएको थियो।