२३ भदौ २०८३, मंगलबार
हङकङका लोकतन्त्रवादी आन्दोलनका प्रख्यात युवा नेता जोशुवा वाङले राष्ट्रिय सुरक्षासम्बन्धी नयाँ मुद्दामा अभियोग स्वीकार गरेका छन् । बुधबार हङकङको उच्च अदालतमा भएको सुनुवाइका क्रममा वाङले अभियोग स्वीकार गरेसँगै उनले थप वर्षौं कारागारमा बिताउनुपर्ने सम्भावना बढेको छ ।
२९ वर्षीय वाङमाथि सन् २०२० मा अन्य अधिकारवादीसँग मिलेर चीन र हङकङविरुद्ध विदेशी प्रतिबन्ध लगाउन आह्वान गर्ने षड्यन्त्र गरेको आरोप लगाइएको छ । चीनले सोही वर्ष हङकङमा नयाँ राष्ट्रिय सुरक्षा कानुन लागू गरेको थियो । आलोचकहरूले उक्त कानुनलाई हङकङको राजनीतिक स्वतन्त्रता र नागरिक अधिकारमाथि अंकुश लगाउने माध्यमका रूपमा टिप्पणी गर्दै आएका छन् ।
वाङ यसअघि नै कारागारमा छन् । सन् २०२४ मा भएको चर्चित ‘राज्य विप्लव’सम्बन्धी मुद्दामा दोषी ठहर भएपछि उनले अहिले चार वर्ष आठ महिनाको जेल सजाय काटिरहेका छन् । बुधबार सुनुवाइ भएको नयाँ मुद्दामा दोषी ठहर भएमा उनलाई जन्मकैदसम्मको सजाय हुनसक्ने कानुनी व्यवस्था छ ।
बेइजिङका अधिकारीहरूले वाङलगायत अन्य लोकतन्त्रवादी कार्यकर्तालाई ‘विखण्डनकारी’ को संज्ञा दिँदै आएका छन् । सन् २०१९ मा हङकङमा भएका विशाल तथा कतिपय हिंसात्मक प्रदर्शनपछि चीनले कडा राष्ट्रिय सुरक्षा कानुन ल्याएको थियो । सरकारले उक्त कानुनले हङकङमा ‘स्थिरता पुनःस्थापना’ गरेको दाबी गर्दै आएको छ । तर मानवअधिकारवादी संगठनहरूले भने कानुनले असहमतिलाई दबाएको र सरकारको आलोचना गर्ने वातावरण जोखिमपूर्ण बनाएको बताएका छन् ।
बुधबारको सुनुवाइका क्रममा सरकारी पक्षले वाङमाथि लगाइएका आरोपको विस्तृत विवरण प्रस्तुत गरेको थियो । हङकङ सरकारका प्रवक्ताले वाङको मुद्दालाई लिएर भइरहेको अन्तर्राष्ट्रिय आलोचनाको खण्डन गरेका छन् । उनले वाक् स्वतन्त्रताको अभ्यासलाई विदेशी शक्तिसँग मिलेर आफ्नै देशलाई हानि पुर्याउने कार्यसँग जोडेर हेर्न नहुने तर्क गरेका छन् ।
अदालत परिसरमा सुरक्षा व्यवस्था कडा पारिएको थियो । वाङलाई समर्थन गर्न तथा उनलाई एक नजर देख्न दर्जनौँ मानिस बिहानैदेखि अदालत परिसरमा लामबद्ध भएका थिए ।
वाङका साथी लुइस लीका अनुसार जेल जीवनका बाबजुद वाङले आफूलाई सकारात्मक राख्न अध्ययन, व्यायाम र गिटार सिक्नेजस्ता गतिविधिमा आफूलाई व्यस्त राखेका छन् । तर, दोस्रो पटक राष्ट्रिय सुरक्षा कानुनअन्तर्गत मुद्दा दायर भएपछि वाङ निकै मर्माहत भएको लीले बताए ।
