वैवाहिक जीवनको सुरुवातसँगै दम्पतीबीच विश्वास र पारदर्शिताको अपेक्षा गरिन्छ । तर, कहिलेकाहीँ जीवनसाथीको विगतको सम्बन्ध वर्तमानमा पनि जोडिइरहँदा त्यसले वैवाहिक सम्बन्धमा दरार ल्याउन सक्छ ।

विज्ञका अनुसार, विवाहपछि पूर्व साथीसँग सामान्य मित्रता कायम राख्नु आफैँमा गलत वा बेवफाई होइन । धेरैजसो मानिसहरू पुरानो सम्बन्धबाट भावनात्मक रूपमा धेरै अगाडि बढिसकेका हुन्छन् र पुरानो चिनजानको नाताले सामान्य शिष्टाचार वा मित्रता मात्र राख्न चाहन्छन् । 

जन्मदिनमा शुभकामना दिनु वा सामाजिक सञ्जालका पोस्टमा प्रतिक्रिया जनाउनुलाई नै भावनात्मक सम्बन्धको प्रमाण मान्न सकिँदैन । यद्यपि, हरेक सम्बन्धको आफ्नै सीमा हुने भएकाले पति वा पत्नीले 'एक्स' सँग कस्तो खालको कुराकानी गर्छन्, कति पटक गर्छन् र त्यो सम्बन्धले वैवाहिक जीवनलाई कति असर पारेको छ भन्ने कुरा मुख्य हुन्छ ।

मनोविज्ञानको दृष्टिकोणले हेर्दा आधा–अधूरी जानकारीका आधारमा निष्कर्ष निकाल्दा समस्या झन् जटिल बन्न सक्छ । पतिको व्यवहार पारदर्शी छ र उनले कुरा लुकाएका छैनन् भने त्यसलाई सकारात्मक रूपमा लिन सकिन्छ ।

तर, यदि पतिले 'एक्स' सँग कुरा गर्न फोन लुकाउने, पासवर्ड परिवर्तन गर्ने, च्याटहरू मेटाउने वा पत्नीसँग भावनात्मक दूरी बढाउने जस्ता व्यवहार देखाएमा मात्र त्यो चिन्ताको विषय बन्न सक्छ । यस्तो अवस्थामा समस्या 'एक्स' नभएर दम्पतीबीचको विश्वास र पारदर्शिताको कमी हुन जान्छ ।

आफ्नो मनमा उब्जने असुरक्षा र डरलाई गलत मान्नु पर्दैन । "मभन्दा उनी बढी महत्वपूर्ण छिन् कि?" वा "उनीहरूबीच फेरि केही हुन सक्छ कि?" भन्ने जस्ता प्रश्नहरू मनमा आउनु मानवीय स्वभाव हो । यस्ता भावनालाई दबाउनुको सट्टा पतिसँग खुला संवाद गर्नु आवश्यक हुन्छ । तर, संवाद गर्दा आरोप लगाउने शैली अपनाउनु हुँदैन । 

"तिमीले मलाई धोका दिँदैछौ" वा "तिमी अझै उसैलाई माया गर्छौ" जस्ता शब्दले पार्टनरलाई प्रतिरक्षात्मक बनाउन सक्छ । त्यसको सट्टा, "तिमीहरूको यो दोस्तीले मलाई असुरक्षित महसुस गराउँछ, त्यसैले हामी मिलेर केही सीमाहरू तय गरौँ" भन्नु बढी प्रभावकारी हुन्छ ।

सुखी वैवाहिक जीवनका लागि दम्पतीले आपसी सहमतिमा केही सीमाहरू (बाउन्ड्री) तय गर्नु राम्रो हुन्छ । उदाहरणका लागि, पूर्व साथीसँग व्यक्तिगत वा गोप्य कुराहरू सेयर नगर्ने, राती अबेरसम्म कुरा नगर्ने र कुनै पनि कुरा पार्टनरबाट नलुकाउने जस्ता नियमहरू बनाउन सकिन्छ । बाउन्ड्रीको अर्थ पार्टनरलाई नियन्त्रण गर्नु नभई सम्बन्धलाई सुरक्षित र सम्मानजनक बनाउनु हो । यदि पार्टनरले तपाईंको चिन्तालाई बुझेर व्यवहारमा पारदर्शिता अपनाउँछन् भने बिस्तारै असुरक्षाको भावना कम हुँदै जान्छ ।

वैवाहिक जीवनमा भरोसा भनेको कुनै एक शब्द वा वाक्य मात्र नभएर निरन्तरको व्यवहारबाट निर्माण हुने प्रक्रिया हो । पुरानो सम्बन्धको उपस्थितिले वर्तमान सम्बन्धलाई असर गर्नु हुँदैन । यदि वर्तमान सम्बन्धमा सम्मान, प्राथमिकता र सुरक्षा छ भने पुराना सम्बन्धहरू केवल सम्झना वा सामान्य मित्रतामा सीमित रहन्छन् । 

त्यसैले, शङ्काको भरमा सम्बन्ध बिगार्नु भन्दा तथ्यलाई बुझेर र संयमित भएर संवाद गर्नु नै उत्तम विकल्प हो ।