२६ असोज २०८३, सोमबार
रसुवा बाढीपीडितको राहत तथा पुनःस्थापनाका लागि नेपाली जनसम्पर्क समिति अस्ट्रेलियाले ८ लाख १७ हजार ५९२ रुपैयाँ सहयोग गरेको छ।
समितिले आफ्ना विभिन्न राज्यमा रहेका सदस्यबाट रकम संकलन गरी नेपाली कांग्रेसको विपद् व्यवस्थापन कोषको खातामा जम्मा गरेको हो ।
समितिका अनुसार एनएसडब्लू सिड्नीबाट ६ लाख, साउथ अस्ट्रेलियाबाट ८१ हजार ७५ रुपैयाँ, एसीटी क्यानबेराबाट ८२ हजार ४६७ रुपैयाँ र वेस्टर्न अस्ट्रेलियाबाट ५४ हजार ५० रुपैयाँ संकलन भएको हो।
यसैगरी, नेपाली जनसम्पर्क समिति, बेल्जियमले पनि ५ लाख ४१ हजार २४८ रुपैयाँ सहयोग गरेको छ ।
बाढीका कारण ज्यान गुमाउनेहरूप्रति श्रद्धाञ्जली अर्पण गर्दै समितिले शोकसन्तप्त परिवारजनमा समवेदना तथा घाइतेहरूको शीघ्र स्वास्थ्यलाभको कामना गरेको छ ।
आर्थिक सहयोग संकलन अभियान अन्तर्गत समितिले ३ हजार १५४ युरो जम्मा गरेको थियो ।
संकलित रकममध्ये ४ लाख १११ रुपैयाँ नेपाली कांग्रेस पार्टीको विपद् व्यवस्थापन कोषमा जम्मा गरिएको र १ लाख ४१ हजार १३७ रुपैयाँ प्रधानमन्त्री दैवी प्रकोप उद्धार कोषमा जम्मा गरिएको समितिका प्रवक्ता दीपक न्यौपानेले जानकारी दिए ।
यसैगरी, बागलुङ समाज बेल्जियमका संस्थापक अध्यक्ष श्रीप्रसाद सापकोटाले प्रधानमन्त्री राहत कोषमा ३ लाख ३३ हजार ३३३ रुपैयाँ सहयोग गरेका छन् ।
उनले आफ्नो व्यक्तिगत र एभरेष्ट हाउस परिवारको तर्फबाट उक्त रकम राहत कोषमा जम्मा गरेका हुन् ।
