२६ असोज २०८३, सोमबार
भारतको गुजरातस्थित भावनगरमा हत्या आरोपमा पक्राउ परेका २० वर्षीय युवकलाई प्रहरीले डोरीले बाँधेर सार्वजनिक रूपमा कुटपिट गरेको आरोप लागेको छ ।
सामाजिक सञ्जालमा सार्वजनिक भएका भिडियोमा आरोपी फैजल उर्फ खत्की रफिक लखानीलाई भावनगरस्थित जीएसआरटीसी बस स्ट्यान्डमा डोरीले बाँधेर प्रहरीको गाडी, पिलर तथा भित्तामा अड्याउँदै लाठीले कुटपिट गरेको देखिन्छ ।
भावनगर प्रहरीले ४० वर्षीया काजलको हत्या आरोपमा लखानीलाई सेप्टेम्बर ४ (भदौ १९ गते) मा पक्राउ गरेको थियो। उनीहरू बस स्ट्यान्डबाहिर सडकमा सँगै बस्दै आएका थिए ।
सेप्टेम्बर ३ मा लखानीले काजल र उनीहरूका साझा साथी रवि उर्फ बोडा राजेन्द्र गोहेललाई बस स्ट्यान्डको मुख्य गेटमा कुटपिट गरेको आरोप छ । भारतको चर्चित मिडियादि इन्डियन एक्सप्रेसले पनि यस सम्बन्धी समाचारलेखेको छ ।
आफू अर्को मुद्दामा जेलमा रहेका बेला काजल र रविबीच प्रेम सम्बन्ध रहेको आरोप लगाउँदै उनले कुटपिट गरेको बताइएको छ। घटनाको दृश्य सीसीटीभीमा समेत कैद भएको थियो । काजललाई अस्पताल पुर्याइए पनि सोही रात चिकित्सकले मृत घोषणा गरेका थिए ।
लखानीलाई सार्वजनिक रूपमा कुटपिट गरिएको भिडियोबारे नीलामबाग प्रहरी थानाका प्रहरी निरीक्षक डीपी उनाडकटले पनि पुष्टि गरेका छन् ।
'हामीले यसो गरेका हौँ, किनभने यो दुर्लभ घटना हो,' उनले भने ।
उनाडकटले लखानी कुनै गिरोहका सदस्य नभए पनि उपद्रव गर्ने बानी रहेको बताए। सार्वजनिक रूपमा कुटपिट गर्दा अपराधीमा प्रहरीप्रति डर पैदा हुने उनको दाबी थियो ।
घटनापछि अदालतमा पेस गरिएका लखानीलाई प्रहरीले हिरासतमा राखेर अनुसन्धान गर्न माग गरेन। उनलाई न्यायिक हिरासतमा पठाइएको उनाडकटले बताए ।
उनाडकटका अनुसार लखानीविरुद्ध यसअघि अपहरण, प्रहरीमाथि आक्रमण र लुटपाटलगायत ६ वटा मुद्दा छन्। तीमध्ये तीनवटा नीलामबाग र तीनवटा वर्तेज प्रहरी थानामा दर्ता भएका छन् ।
यस घटनाको एक साताअघि, अगस्ट २९ मा पोरबन्दर प्रहरीले दुई जनालाई डोरीले बाँधेर विसावाडा गाउँमा घुमाउँदै स्थानीयसँग माफी माग्न लगाएको आरोप लागेको थियो ।
गुजरातका प्रहरी महानिर्देशक केएलएन रावले मे १२ मा प्रहरी अधिकारीलाई पत्र पठाउँदै आरोपीलाई हतकडी लगाउने, डोरीले बाँध्ने र सार्वजनिक रूपमा घुमाउने कार्य स्थापित प्रक्रियाविपरीत भएकाले तत्काल रोक्न निर्देशन दिएका थिए । यस्तो व्यवहारले गुजरात प्रहरीको छवि धुमिल पार्ने उनको भनाइ थियो ।
लखानीलाई सार्वजनिक रूपमा कुटपिट गरेको घटनामा पिपुल्स युनियन फर सिभिल लिबर्टिज (पीयूसीएल), गुजरातले नीलामबाग प्रहरी निरीक्षक उनाडकटसहित संलग्न प्रहरीमाथि कारबाही माग गर्दै गुजरातका मुख्यसचिव, गृह मन्त्रालयका अतिरिक्त मुख्यसचिव, प्रहरी महानिर्देशक र भावनगर प्रहरी प्रमुखलाई कानुनी नोटिस पठाएको छ ।
हेर्नुहोस्, भिडियो :
Gujarat Police serves on the spot Justice
— D (@Deb_livnletliv) September 5, 2026
A 40-year-old woman, Kajalben was beaten to death by her live-in partner Faisal alias Khatki Lakhani.
Police takes him for crime scene reconstruction and helps him relive what Kajalben went through.. pic.twitter.com/jGYy10leno
