नेपाल विद्यार्थी संघ (नेविसंघ)का पूर्वकेन्द्रीय सदस्य खेमबहादुर खड्का राष्ट्रिय स्वतन्त्र पार्टी (रास्वपा)मा प्रवेश गरेका छन् ।

हुम्लाका युवा नेता खड्कालाई रास्वपा सांसद रमेशकुमार सापकोटा, नेता प्रमोद न्यौपाने लगायतले रास्वपा केन्द्रीय कार्यालय वनस्थलीमा पार्टीमा स्वागत गरे ।

खड्कासँगै नेविसंघ सीटीईभीटी समितिका सचिव मंगल फडेरा पनि रास्वपामा प्रवेश गरेका छन् ।

खड्काले यसअघि नेविसंघ हुम्ला-काठमाडौं सम्पर्क समितिको सचिवको जिम्मेवारी समेत पूरा गरिसकेका छन् ।

हुम्लाको खार्पुनाथ गाउँपालिका-१ का खड्का २०७३ सालदेखि नेविसंघमा आवद्ध भएर विद्यार्थी राजनीति थालेका थिए । 

व्यवसायमा समेत संलग्न रहेका खड्काले युवाहरूको आवाज र परिवर्तनलाई आत्मसात गर्दै रास्वपामा जोडिएको बताए ।

उनले बाटो फरक भए पनि समाजसेवाको आफ्नो यात्रा र गन्तव्य भने नबदलिएको बताए । 

‘मैले कुनै राजकीय भूमिकाबिना आफ्नो गाउँठाउँका लागि जे जति गर्न सकेँ त्यसमा म खुसी छु । मैले मेरो विवेक र तागतले सकेसम्म खार्पुनाथका लागि केही न केही सेवा गरेँ भन्ने लाग्छ’, खड्काले भने, ‘युवाहरूको आवाज र परिवर्तनलाई आत्मसात गर्दै थप समाजसेवाका लागि युवाहरूको भरोसाको पार्टी रास्वपामा जोडिएको हुँ ।’

उनले आफू जहाँ रहे पनि व्यक्तिगत स्वार्थभन्दा माथि उठेर समाजकै लागि काम गर्ने बताए ।