पिपिएलमा पोखराको विजयी शुरुआत, काठमाडौँ गोल्डेन पराजित

उद्घाटन खेलमा म्यान अफ दी म्याच पोखरा पल्टनका कुशल भुर्तेललाई ट्रफी प्रदान गर्दै गण्डकी प्रदेश अर्थ तथा विकास समिति सभापति दीपक कोइराला । तस्वीर :कृष्ण दवाडी/रासस

पोखरा प्रिमियर लिग (पिपिएल) टी–२० क्रिकेट प्रतियोगितामा डिफेन्डिङ च्याम्पियन पोखरा पल्टनले विजयी शुरुआत गरेको छ। 

पोखरा रंगशालास्थित क्रिकेट मैदानमा आइतबार भएको उद्घाटन खेलमा घरेलु टोली पोखराले काठमाडौँ गोल्डेन वारियर्सलाई ९ विकेटले पराजित गरेको हो।


Advertisement

टस जितेर पोखराले व्याटिङको निम्तो दिएपछि काठमाडौँले पूरै २० ओभर खेल्दै ८ विकेट गुमाएर १ सय १५ रनको योगफल तयार गरेको थियो।

जितका लागि १ सय १६ रनको विजयी लक्ष्य पोखराले शुरुआती ब्याटस्म्यान कुशल भुर्तेलको अर्धशतकीय ६५ रन योगदानको मद्दतले १४ दशमलव एक ओभरमा मात्र एक विकेट गुमाएर भेट्टायो । जम्मा ४३ बल सामना गरेको खेलको ‘म्यान अफ दी म्याच’ भुर्तेलले पाँच छक्का र चार चौका प्रहार गर्दै अविजित रहँदै टोलीलाई पहिलो खेलमा जित दिलाए ।


Advertisement

पोखराका लागि रवीन्द्र सिंहले अविजित रहँदै ३८ रन जोडे भने शुरुआती ब्याट्सम्यान आशिफ शेख शुसान भारीको बलमा एलविडब्लु हुँदै १४ रन जोडेर पेभिलियन फर्किए । काठमाडौँका लागि सुवोध भाटीले सर्वाधिक ४५ रन बनाए पनि टोलीलाई जित दिलाउन सकेनन् । सर्वजीत लड्डाको बलमा आशिफ शेखबाट क्याच आउट हुनुअघि उनले २९ बलमा चार चौका र चार छक्कासहित ४५ रन बनाएका थिए । 

पोखराका रशियो खान, ललितनारायण राजवंशी र कुशल मल्लले २÷२ तथा सर्वजित लड्डा तथा प्रथमेश ढाकेल एक÷एक विकेट लिएका थिए । क्विन्स इभेन्ट म्यानेजमेन्ट प्रालीले आयोजना गरेको प्रतियोगिताका विजेताले २७ लाख तथा उपविजेताले १० लाख पुरस्कार पाउनेछन् । ‘म्यान अफ दि सिरिज’, ‘उत्कृष्ट ब्याट्सम्यान’ र ‘उत्कृष्ट बलर’ गरी तीन जना खेलाडीलाई टिभिएस मोटरसाइकल पुरस्कार प्रदान गरिनेछ।

त्यसैगरी प्रतियोगिताको ‘मोस्ट भ्यालुएवल’ खेलाडीलाई एक लाख, ‘इमर्जिङ’ खेलाडीलाई  ५० हजार तथा प्रत्येक खेलको ‘म्यान अफ दि म्याच’लाई  १० हजार पुरस्कार प्रदान गरिने आयोजकले जनाएको छ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्