संगीतकार पेलाले २३ वर्षपछि ल्याए आँसु–३ एल्बम

लामो समयदेखि शास्त्रीय संगीतमा साधनारत गायक तथा संगीतकार तिकलसिंह पेलाले २३ वर्षपछि आँसु एल्बमको तेस्रो भाग ‘निर्जन किनार’को प्रोमो सार्वजनिक गरेका छन् ।

शनिवार राजधानीमा आयोजित पत्रकार सम्मेलनमार्फत आँसु–३ मा २ वटा नेपाली गजल, ४ वटा आधुनिक गीत, एउटा हिन्दी भजन गरी ८ वटा रचना समावेश गरिएको गायक पेलाले बताए ।


Advertisement

तीमध्ये ‘निर्जन किनार’ र ‘कथा एउटै तिम्रो मेरो’ गीतको कार्यक्रममा प्रोमो सार्वजनिक गरिएको हो ।

विक्रम संवत् २०५३ सालमा आफ्नै गायन तथा संगीतमा आँशु एल्बम बजारमा ल्याएका गायक तथा संगीतकार पेलाले २०५४ सालमा आँसु भाग २ ल्याएका थिए ।


Advertisement

आँसु एल्बमले त्यतिबेला निकै चर्चा पाएको थियो । विक्रम संवत् २०६१ सालदेखि काठमाडौं वनस्थलीमा श्रीकृष्ण गुरुकुल संगीत पाठशालाको स्थापना गरी उनी शास्त्रीय संगीत साधनामा तल्लिन रहे । स्रोताहरूको अपार माया र स्नेहले २३ वर्षको साधनापछि आफू आँसु भाग ३ लिएर सांगीतिक बजारमा पुनः आएको गायक पेलाले बताए । 

एल्बम पुस २६ गते औपचारिक समारोहबीच सार्वजनिक हुने भएको छ । सांगीतिक हिसाबले सुदूरपश्चिमलाई देउडाका माध्यमले बढी चिन्ने गरिन्छ तर पेलाले देउडाका साथसाथै शास्त्रीय संगीतका माध्यमलाई मूल विधा बनाए ।

उनले पनि देउडा नगाएका भने होइनन् । एउटा मातृभूमिप्रति समर्पित देउडा गीतको एल्बम नै निकाले उनले तर उनको छवि शास्त्रीय संगीतमै बन्यो ।  

ज्ञान विनाको नाम कमाएर आफू पनि ठगिनु र अरुलाई पनि ठग्नु जस्तो लागेर शास्त्रीय संगीतको लामो साधनापछि झण्डै २३ वर्ष पछाडि रेकर्डिङको दुनियाँमा आफू फर्केको पेलाले बताए ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्