इरानले यात्रुवाहक विमान खसाउनुमा अमेरिकासँगको तनाव पनि जिम्मेवार : क्यानडेली प्रधानमन्त्री

इरानले क्षेप्यास्त्र हानेर यात्रुवाहक विमानका खसाउनुमा अमेरिकासँगको तनाव पनि जिम्मेवार रहेको क्यानडाका प्रधानमन्त्री जस्टिन ट्रुडोले बताएका छन् । त्यो तनाव नभएको भए विमानका यात्रुहरू बाँचिरहन्थे होला, उनले भने ।

‘मलाई लाग्छ, तनावहरू नभएको भए, उक्त क्षेत्रमा युद्ध चर्किने स्थिति नआएको भए, विमानमा रहेका क्यानडेलीहरू अहिले परिवारसँग घरमा हुन्थे,’ ग्लोबल टेलिभिजनसँगको अन्तर्वार्तामा ट्रुडोले बताए । 


Advertisement

अन्तर्राष्ट्रिय समुदायले गैरआणविक इरान चाहेको अत्यन्तै स्पष्ट छ तर अमेरिकाको कारवाहीका कारण उक्त क्षेत्रमा उब्जेको तनाव व्यवस्थापन पनि गर्नुपर्ने उनले थपे । 

युक्रेन इन्टरनेसनल एयरलाइन्सको बोइङ ७३७ गत बुधवार बिहान तेहरानबाट उड्नेबित्तिकै एक क्षेप्यास्त्रले हानेर खसाइएको थियो र विमानमा सवार सबै १७६ जनाको मृत्यु भएको थियो । 


Advertisement

तिनीहरूमध्ये ५७ जना क्यानडेली नागरिक थिए । धेरैजसोले इरान र क्यानडा दुवैको नागरिकता लिएका थिए । 

अमेरिका र इरानबीच लामो समयदेखि विद्यमान तनाव पुस १८ गते अमेरिकी ड्रोनले प्रहार गरेका क्षेप्यास्त्रले इरानका शीर्ष कमान्डर कासिम सुलेमानीलाई बग्दाद विमानस्थल नजिक मारेपछि ह्वात्तै बढेको थियो ।

त्यसपछि इरानले इराकस्थित दुई अमेरिकी सैन्य अड्डामा क्षेप्यास्त्र प्रहार गरेको थियो तर त्यसमा कुनै हताहती भएन । तनाव घटाउन त्यसो गरिएको मानिएको थियो । 

त्यसको केही घन्टापछि इरान रिभोल्युसनरी गार्ड कोर्प्सको इकाइले भूलवश युक्रेनी यात्रुवाहक जेट विमानलाई प्रहार गरेको थियो । इरानका राष्ट्रपति हसन रूहानीले यसलाई मानवीय त्रुटि बताए । 

द गार्डियनबाट
 

कमेन्ट गर्नुहोस्