पश्चिम एसियाका लागि ट्रम्पले ल्याए योजना : इजरायलको स्वागत, प्यालेस्टाइनको अस्वीकार

अमेरिकाका राष्ट्रपति डोनल्ड ट्रम्पले इजरायल र प्यालेस्टाइनबीचको द्वन्द्व अन्त्यका लागि द्विराष्ट्रिय समाधानको योजना प्रस्तुत गरेका छन् । 

उनले मिडल ईस्ट पीस प्लानका रूपमा जेरुसेलमलाई इजरायलको अविभाजित राजधानी बनाउने प्रस्ताव राखेका छन् । प्यालेस्टाइनले त्यसलाई पूरै अस्वीकार गरेको छ । 


Advertisement

ट्रम्पले यस योजनालाई ऐतिहासिक बताए अनि यस विवादको यही नै आखिरी समाधान भएको संकेत दिए । 

इजरायलका प्रधानमन्त्री बेन्जामिन नेतान्याहूसँग ह्वाइट हाउसमा ट्रम्पले कुराकानी गरेपछि द्विराष्ट्रिय समाधानको योजना सार्वजनिक गरेका हुन् । यसले शान्ति ल्याउने र कुनै पनि इजरायली र प्यालेस्टाइनीले घर छोड्नु नपर्ने ट्रम्पको कथन छ । चार वर्षसम्म इजरायलमा सेटलमेन्ट रोक्ने र प्यालेस्टाइनको क्षेत्र दुईगुणा बढाउने ट्रम्पको प्रस्ताव छ । 


Advertisement

प्यालेस्टाइनका लागि ट्रम्पले पूर्वी जेरुसेलमलाई राजधानी बनाउने प्रस्ताव राखे र त्यहाँ अमेरिकी दूतावास स्थापना गर्ने बताए । उनले प्यालेस्टाइनलाई यो सम्झौता स्वीकार गरेर क्षेत्रमा शान्ति स्थापना गर्न अपील गरे । यो ऐतिहासिक र शताब्दीकै सबभन्दा ठूलो सम्झौता भएको दाबी गर्दै ट्रम्पले यसका लागि संसारभरिका मानिसको समर्थन रहेको बताए । प्यालेस्टाइनलाई स्वतन्त्र राज्य बन्ने ऐतिहासिक अवसर यसले दिएको ट्रम्पले बताए । 

इजरायलका प्रधानमन्त्री नेतान्याहूले ट्रम्पको योजना इजरायलका लागि ऐतिहासिक दिन भएको बताए । अन्य सबै योजना विफल भइसकेकाले यो सन्तुलित योजनालाई अंगीकार गर्नुपर्ने उनको भनाइ छ । यसै आधारमा प्यालेस्टाइनसँग शान्ति सम्झौता गर्न आफू तयार रहेको उनले बताए । 

यस चर्चामा कुनै पनि प्यालेस्टाइनी अधिकारी उपलब्ध थिएन । ओमान, संयुक्त अरब अमिरात र बहराइनका राजदूत चाहिँ ह्वाइट हाउसमा थिए । 

प्यालेस्टाइनका राष्ट्रपति महमूद अब्बासले ट्रम्पको यस योजनालाई पूरै अस्वीकार गर्दै आफूहरू नझुक्ने अनि शान्तिपूर्ण तरिकाले इजरायलको विरोध गरिरहने बताए ।

ट्रम्पले इजरायलसँग मिलेर अमेरिकाले जोइन्ट कमिटी बनाउने र एक विस्तृत नक्सा तयार पार्ने अनि यस योजनालाई सकेसम्म छिटो कार्यान्वयन गर्ने बताए ।

ह्वाइट हाउसले एक बयान जारी गर्दै राजनीतिक गतिरोध अन्त्य गर्न, शान्ति स्थापना गर्न र आर्थिक विकासलाई साकार पार्नका लागि ठूलो कदम इजरायल र प्यालेस्टाइनका नेताहरूले उठाउनुपर्ने बताए ।

एजेन्सी
एजेन्सी

लेखकबाट थप...

कमेन्ट गर्नुहोस्