मंसिर ४ मा देशभर प्रतिनिधिसभा तथा प्रदेशसभा सदस्य चयनका लागि निर्वाचन भयो । 

यही निर्वाचनबाट चुनिएको संसद्ले सरकार गठन गर्छ । राष्ट्रपति र उपराष्ट्रपतिको चयन गर्छ । आफ्नो प्रतिनिधि चयन गर्ने यो चुनाव मत दिने जाँगर छाडेर युवा भने रोजगारी खोज्दै विदेशिन बाध्य छन् । 

मतदान केन्द्रमा भन्दा त्रिभुवन अन्तर्राष्ट्रिय विमानस्थलमा युवाको भीड बाक्लो देखियो । त्यसमध्ये कतिपय अध्ययनका लागि र धेरै चाहिँ रोजगारीका लागि विदेशिन लागेको भेटियो । 

कक्षा १२ उत्तीर्ण गरेर स्नातक तह अध्ययनका लागि जापान हिँडेका बाराका– २० वर्षीय राजेश श्रेष्ठले भने, ‘नेपालमा काम गर्ने वातावरण नभएर विदेश हिँडेको हुँ ।’ 

नेपालमा राम्रो रोजगारीको अवसर नभएकाले विदेशमा अध्ययन गर्ने र उतै रोजगारी पनि गर्ने उद्देश्यले जापान जान लागेको उनले बताए । 

‘हाम्रो त सरकार नै ठीक छैन । कसैले पनि काम गर्न सकेनन् । जनतालाई ढाँटेर, छलेर खाने मात्रै देखियो । आजको चुनावले परिवर्तन ल्याए हुन्थ्यो’, उनले भने ।

मोरङ विराटचोकका ललित भुजेल १८ वर्षदेखि बहराइनमा काम गर्दै आएका छन् । उनी दशैं–तिहार मनाउन नेपाल आएका रहेछन् । उनी पनि मतदानमा सहभागी नभई विदेश हिँडेका छन् ।

भुजेलले बहराइन उड्नुअघि लोकान्तरसँग भने, ‘नेपालमा अवसर नभएकै कारण वैदेशिक रोजगारीमा जानुपरेको हो । बेला–बेला परिवारका सदस्य भेट्न आउने र फर्किहाल्ने गरेको छु ।’

धनकुटाका विक्रम राई पनि रोजगारीकै लागि विदेशिएका छन् । ‘नेपालमा क्षमता भएकालाई पनि २०/३० हजार कमाउन समस्या छ । त्यसैले रोजगारीकै लागि विदेशिनु परेको छ’, राईले भने ।

रोजगारीकै लागि ओमान हिँडेका स्वयम्भुका सुशन नगरकोटी नेपालमा अवसर नभएकाले विदेशिन बाध्य भएको बताउँछन् । 

‘हामी त बाध्यताले विदेशिन परेको छ । अबको ५ वर्षपछि विदेश जानु नपरोस् र नयाँ पुस्ताले पनि नेपालमै अवसर पाउने वातावरण बनोस्’, उनले भने । 

हेर्नुहोस्, भिडियो :