चर्चित हास्य अभिनेता जितु नेपाल ‘मुन्द्रेको कमेडी क्लब’को तेस्रो सिजनको तयारीमा छन् । माघको २० गतेबाट प्रदर्शनमा आउने उनको फिचर चलचित्र ‘ह्यारीकी प्यारी’ रिलिजको केही हप्तामै उनले कमेडी क्लबको नयाँ सिजन प्रसारणमा ल्याउनेछन् । 

नयाँ सिजनमा कलाकारसहित अध्यक्ष समेत परिवर्तन गरिएको छ । अभिनेत्री प्रियंका कार्कीलाई नयाँ सिजनमा दर्शकहरुले अध्यक्षको भूमिकामा देख्न पाउनेछन् । 

पहिलो सिजनमा अभिनेत्री एवं निर्देशक दीपाश्री निरौला र दोस्रो सिजनमा अभिनेत्री करिष्मा मानन्धर अध्यक्ष रहेका थिए । अध्यक्षमा निरन्तरता नदिने करिष्माकै आग्रहअनुसार तेस्रो सिजनमा नयाँ अध्यक्ष राखिएको ‘मुन्द्रेको कमेडी क्लब’का प्रस्तोता अभिनेता जितुले जानकारी दिए । 

‘करिश्मा दिदीले पहिल्यै पनि म धेरै समय साथ दिँदिन् है भनेर भन्नुभएको थियो । मैले हवस् भनेको थियो’ जितुले लोकान्तरसँग भने, ‘पछि उहाँले अब तिमी चेन्ज गर है जितु भनेर भन्नुभएको थियो । अनि प्रियंकाजीलाई लिने निर्णय गरेका हौँ ।’

उनले अभिनेत्री प्रियंका कार्कीसँग यसअघि चलचित्र लगायतमा धेरैपटक सहकार्य गरेको र रमाइलोसँगै सहकार्य भएको स्मरण गरे ।

‘नयाँ अध्यक्ष राख्नुपर्दा प्रियंकाजी नै पहिले दिमागमा आउनुभयो’ जितुले अगाडि भने, ‘अनि एकपटक उहाँलाई कुरा राखौँ न त कुन रुपमा लिनुहुन्छ भनेर कुरा राखेँ । उहाँ एकदमै सकारात्मक हुनुभयो ।’ 

जितुले प्रियंकाको खुलेर तारिफ समेत गरे । प्रियंकालाई अध्यक्षमा सुहाउँछ भन्ने लागेपछि नयाँ अध्यक्षको रुपमा तय गरिएको उनले स्पष्ट पारे ।

‘उहाँ काम भनेपछि एकदमै मरि मेटने । सबैकुरा बुझेकी । एकदमै हँसिली, हाँसिरहने । हामी उहाँसँग यसो कमेडी गर्दा पनि सुहाउँछ भन्ने लागेपछि फाइनल गरेको हुँ’ – उनले भने । 

कतिपयले कमेडी क्लबको अध्यक्षमा हास्य क्षेत्रकै कलाकार राख्न समेत सुझाउने गरेका थिए । ‘हास्य क्षेत्रकै राख्दा हामी खुम्चिछौं कि जस्तो लाग्छ । त्यसले चलचित्रको प्रतिनिधित्व गर्यो नी’ – अध्यक्षमा चलचित्र क्षेत्रको कलाकार राख्नुको कारणबारे जितुले प्रष्टयाए । 

‘मुन्द्रेको कमेडी क्लब’को तेस्रो सिजनमा दमन रुपाखेतीसहितका कलाकारले प्रवेश गरेका छन् । दमनसहित श्याम राना, दिनेश काफ्ले, राजेन्द्र नेपाली ‘लट्टे’, प्रभात लामा र एलिना बास्कोटा ‘सान्नानी’ यो सिजनमा देखिनेछन् । पुरानोभन्दा केही फरक रूपमा नयाँ सिजन आउने जितुले जानकारी दिए ।

‘मुन्द्रेको कमेडी क्लब’को तेस्रो सिजनको शीर्ष गीत समेत तयार भइसकेको छ । यसअघि जितु स्वयंमको निर्देशन रहेको ‘मुन्द्रेको कमेडी क्लब’को तेस्रो सिजनलाई भने डिनेश डिसीले निर्देशन गर्दैछन् ।