एकीकृत समाजवादीका अध्यक्ष माधव नेपालले ४ मंसिरको निर्वाचनमा पार्टीले सोचेजस्तो नतिजा नआएको बताएका छन् ।

पार्टीको केन्द्रीय कमिटी बैठकमा अध्यक्ष नेपालले प्रत्यक्षमा १० सिट जिते पनि पार्टीले ३ प्रतिशत थ्रेसहोल्ड कटाउन नसक्नु दुःखद् भएको बताएका हुन् ।

‘निर्वाचनको परिणाम हामीले सोचेजस्तो भएन । १० सिटमा विजय हासिल भए पनि ३ प्रतिशत थ्रेसहोल्ड कटाउन सकेनौं । हामीबाट त्रुटि भयो । माथिबाट त्रुटि भयो । हामीले आकलन गर्दागर्दै पनि त्रुटि भएको छ’, उनले भने, ‘१ लाख ३६ हजार पार्टी सदस्यले तीन जनाको पनि मत प्राप्त गर्न नसक्ने हो भने ती सदस्यको के काम ?’

चार सय जनाको केन्द्रीय सदस्य रहेको भन्दै उनले प्रत्येक केन्द्रीय सदस्य खटे कि खटेनन् भन्ने पनि प्रश्न रहेको बताए ।

समानुपातिकका प्रचार गर्न पाइँदैन भन्ने पनि सुनिएको भन्दै गठबन्धनको धुनमा त्यसको भूत ज्यादा सवार भयो कि भन्दै प्रश्न पनि उठाए ।

पार्टीले अब समीक्षा गर्नुपर्ने उनले बताए । एउटा घटनाले मात्रै सबैथोक नसकिने भन्दै उनले लामो यात्रामा कमजोरी सुधार गरेर जानुपर्ने पनि प्रस्ट्याए।