प्रधानमन्त्री एवं माओवादी अध्यक्ष पुष्पकमल दाहाल प्रचण्डले देश नै माओवादीको मुद्दामा आधारित रहेको बताएका छन् । 

आदिवासी जनजाति आयोगले आज (शनिबार) काठमाडौँको भृकुटीमण्डपमा आयोजना गरेको कार्यक्रममा प्रचण्डले आफूहरूले उठाएको एजेण्डामा देश हिँडेको बताएका हुन् ।

उनले भने, ‘सिंगो देश नै हामीले गरेको आन्दोलन र मुद्दाको वरिपरि नै छ । हाम्रो आन्दोलनको विजय भएको छ तर, एउटा प्रश्न त आउँछ नै । एउटा नेतृत्वले समाज रुपान्तरणका लागि जेजस्तो संघर्ष र त्याग गर्‍यो, त्यसलाई सम्मान गर्न हामी चुकेका त छैनौँ ?'

उनले माओवादी आन्दोलनविना यी मुद्दा सम्बोधन हुन सम्भव नभएको पनि बताए। 

माओवादी आन्दोलनकै कारण देशमा महिला राष्ट्रपति, महिला प्रधानन्यायाधीश र महिला सभामुख बनेका पनि दाबी गरे।