२ दिनभित्र गृह मन्त्रालय नपाए सरकारबाटै बाहिरिने राष्ट्रिय स्वतन्त्र पार्टीको अल्टिमेटमबारे प्रधानमन्त्री पुष्पकमल दाहाल संक्षिप्त प्रतिक्रिया दिएका छन् ।

माओवादी केन्द्रको स्थायी कमिटी बैठकपछि सञ्चारकर्मीले रास्वपाको अल्टिमेटम सकिनै लाग्दा अब कसरी समाधान गर्नुहुन्छ भन्ने प्रश्नमा प्रचण्डले भने, 'अहिले मेरो कुरा हुँदैछ। समस्याको समाधान हुन्छ।’

बिहीबार राति रास्वपाले आफूहरूले गृह मन्त्रालय नपाए सरकारबाटै बाहिरिने भन्दै २ दिनको समय दिएको थियो ।

तर २ दिनमा रास्वपालाई गृह दिनेबारे प्रधानमन्त्रीले कुनै औपचारिक छलफल गरेनन् ।

शनिबार मात्रै प्रधानमन्त्रीले बालुवाटारमा एमाले अध्यक्ष केपी ओलीसँग भेट गरेका थिए ।

तर रास्वपाले माग गरेजस्तो उच्चस्तरीय राजनीतिक संयन्त्रको बैठक बोलाउन प्रचण्ड इच्छुक नभएको बताइन्छ ।

२ दिनमा आफूहरूको माग पूरा नभए सरकारबाटै फिर्ता हुनेसम्म चेतावनी रास्वपाले दिएको छ ।

नागरिकता मुद्दामा १३ माघमा सभापति रवि लामिछानेको सांसद पद खारेज भएपछि उनको गृहमन्त्री पद पनि गएको थियो ।

तर गैरसांसद भए पनि उनले उपनिर्वाचनबाट जितेर आउने भन्दै गृहमन्त्री फेरि बनाउन पटकपटक दबाब दिँदै आएका छन् ।

तर प्रधानमन्त्रीले उनको मुद्दाको फैसलाको पूर्णपाठ आएपछि मात्रै एउटा टुंगोमा पुग्नेपर्ने जवाफ दिइरहेका छन्।

रास्वापाको केन्द्रीय समिति र संसदीय दलले दिएको अल्टिमेटम सकिन लाग्दा पनि कुनै प्रगति भने देखिएको छैन ।