भुटानका प्रधानमन्त्री लोटे छिरिङले डोक्लाम विवादमा भारत र भुटान जस्तै चीनको पनि धारणा समावेश गर्नुपर्ने बताएका छन् । 

भारत–भुटान–चीनको त्रिदेशीय विन्दुका रूपमा रहेको डोक्लाममा ६ वर्षअघि भारत र चीनका सेना आमनेसामने भएका थिए । 

भुटानी प्रधानमन्त्रीको भनाइमा भारतको प्रतिक्रिया आउन बाँकी छ । 

‘डोक्लाम त्रिदेशीय विन्दु हो । भुटान एक्लैले यस समस्याको समाधान गर्न सक्दैन,’ बेल्जियमको एक दैनिक पत्रिकालाई अन्तर्वार्ता दिँदै छिरिङले बताए । 

‘हामी तीन देश छौं । यहाँ कुनै ठूलो वा सानो देश छैन, तीनै देशको हैसियत बराबर छ,’ उनले थपे । 

विवाद समाधानका लागि गरिने छलफलमा भुटान तयार रहेको र अन्य दुई देश पनि तयार हुनेबित्तिकै कुराकानी थाल्ने उनले बताए । सञ्चारमाध्यमहरूमा आएजस्तो भुटामा चीनले गाउँ वा बस्ती बनाएर अतिक्रमण गरेको घटना नभएको उनले स्पष्ट पारे । 

भारतीय अधिकारीहरूले चाहिँ डोक्लाममा चीनका गतिविधिहरूबाट उसले अग्रता लिन खोजेको र यथास्थितिलाई उल्लंघन गर्ने चिनियाँ प्रयासलाई उल्लंघन गर्न खोजेको रूपमा हेरेका छन् ।