जिल्ला प्रहरी कार्यालय पर्साले अनलाइनमार्फत सट्टाबाजी गर्ने ४ जनालाई पक्राउ गरेको छ ।

बुधवार वीरगञ्ज महानगरपालिका–१५ स्थित सञ्जय श्रीवास्तवको ३ तले पक्की घरको माथिल्लो तलाको उत्तरपट्टिको कोठामा अनलाइनमार्फत मुम्बई इन्डियन्स भर्सेस लखनऊ सुपर जोइन्टस् टीमबीचको खेलको सट्टाबाजी गरिरहेको अवस्थामा ४ जनालाई पक्राउ गरिएको हो ।

विशेष सूचनाको आधारमा खटिएको प्रहरी टोलीले घरको खानतलासी गर्दा सट्टाबाजीमा प्रयोग भएका मोबाइल, ल्यापटप तथा नेपाली नगद ३ लाख ९० हजार ५०० रुपैयाँ र भारतीय नगद १५ हजार ७५० बरामद गरिएको छ ।

पक्राउ पर्नेमा बाराको कलैया उपमहानगरपालिका–४ बस्ने ३१ वर्षीय सरोज साह, सर्लाहीको रामनगर गाउँपालिका–६ बस्ने ३५ वर्षीय सन्तोषकुमार यादव, पर्साको वीरगञ्ज महानगरपालिका–२४ बस्ने ३४ वर्षीय धुरेन्द्रप्रसाद यादव र भारतको उत्तर प्रदेश गोरखपुर देवरिया बस्ने ५२ वर्षीय मुन्ना भन्ने धर्मनाथप्रसाद जैसवाल रहेका छन् ।

पक्राउ परेका आरोपीलाई सट्टाबाजी सम्बन्धी कसूरमा बिहीवार जिल्ला प्रशासन कार्यालय पर्साबाट म्याद थप गरी थप अनुसन्धान कार्य भइरहेको प्रवक्ता प्रहरी नायव उपरीक्षक दिपक गिरीले जानकारी दिए ।