प्रधानमन्त्री पुष्पकमल दाहाल प्रचण्डले संविधानलाई ट्रयाकमा ल्याउन नागरिकता विधेयक प्रमाणीकरण औचित्यपूर्ण देखिएको बताएका छन् । प्रतिनिधिसभामा सांसदले उठाएका प्रश्नको जवाफ दिँदै प्रचण्डले दुवै सदनबाट दुइपटक पारित भएपछि प्रक्रिया पूरा भएको बताएका हुन् । 

‘जनताको हितलाई ध्यानमा राखेर दुवै सदनबाट पारित भएको नागरिकता विधेयक प्रमाणीकरणलाई पारित गर्न अनुरोध गरेका हौं । सरकारले दराजभित्र छ हेर्नुहोस् त भनेर राष्ट्रपतिलाई अनुरोध गरेको हो । विधेयकलाई हेर्नु त भनेर सरकारलाई भनेको पनि होइन’ प्रधानमन्त्रीले भने, ‘दुवै सदनबाट विधेयक पारित गरेर पठाउँदा फेरि राष्टपतिले दराजमा हाल्दिए हाम्रो लोकतन्त्रमाथि घात हुन्थ्यो । पास भइसकेको हो, प्रक्रिया पूरा गरेपछि राष्टपति कहाँ स्वीकृतिका लागि पुगिसकेको हो । नागरिकता विधेयक प्रमाणीकरण गरेर संविधान ट्रयाकमा ल्याउन आवश्यक थियो । संविधान ट्रयाकमा आयो ।’

दुई-दुईपटक सदनबाट पारित भएर प्रक्रिया पूरा भएको, छलफलका क्रममा पनि फेरि ल्याउँदा समस्या नहुने सुझाव आएको उनको भनाइ छ । 

यस अघि दुवै सदनबाट पारित भएको नागरिकता विधेयकलाई तत्कालीन राष्ट्रपति विद्या भण्डारीले रोकेकी थिइन् । 
राष्ट्रपतिमा रामचन्द्र पौडेल आएपछि यो विधेयक पारित भएको हो ।