शनिवार राति काठमाडौंको गैह्रीगाउँमा हत्या गरिएका चारमध्ये एक थिए मोरङको बेलबारी–२ का २० नवीन राई ।

उनी वैदेशिक रोजगारीमा जाने तयारीका साथ पासपोर्ट बनाउनका लागि एक महिना अगाडि मात्रै काठमाडौंमा गएका थिए । उनकी एक जना दिदी छिन् । गैह्रीगाउँ हत्याकाण्डमा राईसँगै दोलखाका कुमार भुजेल, उनकी श्रीमती अम्बिका भुजेल र आमा शुभद्रा भुजेलकोसमेत हत्या भएको थियो । 

नवीनलाई केही समयअघि लाहुर पठाउन भनेर आमा कान्छीमाया लिम्बूले धरान पठाएकी थिइन् । नवीन धरानमा ‘ट्रेनिङ’ सकेर काठमाडौं गएका थिए ।

काठमाडौंमै केही काम गर्ने र विदेश जाने उनको तयारी थियो । ‘फुपूको छोरासँगै पासपोर्ट बनाउन भनेर काठमाडौंमा गएका रहेछन्,’ नवीनकी छिमेकी खड्गमाया लिम्बूले भनिन्, ‘फुपूका छोरा हिजो मात्रै घर आए । नवीनले पासपोर्ट नबनाइ घर गए आमाले गाली गर्नुहुन्छ, मैले पासपोर्ट लिएर देखाउनु छ भनेर भनेका रहेछन् ।’

प्रहरीले घटनामा संलग्न भएको आशंकामा दीपेन्द्र राईलाई नियन्त्रणमा लिएको छ ।

छिमेकी खड्गमायाका अनुसार दीपेन्द्र नवीनको ठूलो बुबाको छोरा हुन् । दीपेन्द्र नवीनका दाजु पर्छन् । नवीनका बुवा पहिले त्यहीँ काठ मिलमा काम गर्ने गरेको छिमेकीहरू बताउँछन् । नवीन काठमाडौं गएपछि दीपेन्द्र पनि सँगै बस्ने गरेका थिए । दीपेन्द्रले भने अन्यत्र नै काम गर्ने गरेका थिए । 

‘नवीनसँगै भुजेल परिवारका पनि तीन जना मारेका रहेछन् । मृतक कुमार र नवीनको केही दिनअगाडि मात्रै झगडा भएको थियो भनेर नवीनकै फुपूका छोराले उनका आफन्तलाई सुनाएको रहेछन्,’ खड्गमायाले भनिन्, ‘खासमा नवीन कसैसँग पनि झगडा गर्दैन थियो । आमा पनि साह्रै मेहनती थिइन् । गाउँमा आएका बेला सबैलाई भेटेर बोलेर मात्रै हिँड्ने गरेका थिए ।’