एसिया कप क्रिकेटको फाइनलमा श्रीलंकालाई ध्वस्त बनाउन भारतीय फास्ट बलर मोहम्मद शिराजले सनसनीपूर्ण प्रदर्शन गरेका छन् । टस जितेर पहिले ब्याटिङ रोजेको श्रीलंकाले पहिलो ओभरदेखि नै विकेट गुमायो ।  

पहिलो ओभरमै जसप्रित बुमराहले विकेट लिए ।

तर मोहम्मद शिराजले चौथो ओभरमा श्रीलंकालाई ध्वस्त पारेका हुन् । उनले एकै ओभरमा श्रीलंकाको चार विकेट लिएका हुन् । ५.४  ओभरमा ५ विकेट पूरा गरेका शिराजले ११.२ ओभरमा व्यक्तिगत छैटौं विकेट लिएका हुन् ।

७ ओभरमा १ मेडन राख्दै २१ रन दिएर शिराजले फाइनलमा ६ विकेट आफ्नो नाममा लेखाए । 

हार्दिक पाण्ड्याले पनि २.३ ओभरमा ३ रन दिएर ३ विकेट लिए । 

भारतीय बलरसामु शुरूदेखि नै धर्मराएको श्रीलंका अन्ततः १५.२ ओभरमा ५० रन बनाएर अलआउट भयो । ​

श्रीलंकाका लागि कुशल मेन्डिसले बनाएको १७ र दुशान हेमन्थले नटआउट बनाएको १३ रन नै उच्च दोहोरो अंकको रन बन्न पुग्यो । ​

श्रीलंकाका ५ खेलाडीले कुनै रन बटुल्न सकेनन् । ५० रन बनाउँदा श्रीलंकाले ५ वटा मात्रै चौका प्रहार गर्‍यो ।