असोज २६ गतेबाट प्रदर्शनमा आउन लागेको नारायण रायमाझी निर्देशित चलचित्र ‘परदेशी २’ यसै साताबाट देश दौडाहामा निस्किने भएको छ । 

केही दिन काठमाडौंका विभिन्न कलेजहरूमा पुगेर नाटक प्रस्तुत गरेको चलचित्रको यही बिहीवार (असोज ४)बाट देश दौडाहा सुरु हुन लागेको हो । 

‘परदेशी २’कै थिममा आधारित रहेर तयार पारिएको नाटक लिएर काठमाडौं बाहिरका मुख्य शहरमा पुग्न लागिएको निर्माण टिमले जानकारी दिएको छ । नाटकमा चलचित्र बाहिरका प्रोफेसनल कलाकारहरूले प्रस्तुति दिनेछन् । 

त्यस्तै, देश दौडाहामा चलचित्रका मुख्य कलाकारहरू अभिनेता प्रकाश सपूत, अभिनेत्रीद्वय केकी अधिकारी र वर्षा शिवाकोटीलगायतको सहभागीता रहनेछ । 

चलचित्रको टिमले असोज ४ र ५ गते चितवनमा कार्यक्रम गर्ने तय भएको छ । त्यसपछि ७ र ८ गते नेपालगञ्ज पुगेर कार्यक्रम गर्नेछ ।

९ र १० गते बुटवलमा कार्यक्रम हुनेछ भने ११ र १२ गते चलचित्रको टिम पोखरा पुगेर कार्यक्रम गर्नेछ । देशका यी मुख्य शहरका स्कूल/कलेजमा हुने कार्यक्रममा चलचित्रका मुख्य कलाकारहरूले विभिन्न प्रस्तुतिका साथ प्रचारप्रसार गर्दै चलचित्र हेर्न दर्शकलाई आग्रह गर्नेछन् । 

चलचित्र बाहिरका कलाकारहरूले ‘विदाई’ शीर्षकको साङ्गीतिक पक्षलाई समेत समेटिएको नाटक कलेज ड्रेसमै प्रस्तुत गर्नेछन् । ​

रमेश बिजीको कथा लेखन रहेको ‘परदेशी २’ विदेशमा पढ्न जाने विद्यार्थीहरूको कथामा निर्माण भएको हो । विद्यार्थीको कथामा बनेको चलचित्र भएका कारण सोही विषयमा नाटक तयार पारेर प्रस्तुत गरिएको निर्देशक नारायण रायमाझीले बताएका छन् । यसले चलचित्रको प्रचारमा ठूलो भूमिका खेल्ने विश्वास निर्माण टिमको ।

‘परदेशी २’ मा प्रकाश, केकी र वर्षाका साथमा नीर शाह, रमा थपलिया, प्रशान्त तामाङ्ग, दीलिप रायमाझी, देवेन्द्र बब्लु, सुशील पोखरेल, सबिन बास्तोला, रोशनी कार्की लगायतको अभिनय छ । लोकदोहोरी गायनमा स्थापित प्रकाशको यो पहिलो चलचित्र हो । 

राजेश बंशल (अग्रवाल) र नारायण रायमाझीले संयुक्त रुपमा चलचित्रको निर्माण गरेका हुन् । यसको अघिल्लो श्रृङ्खला बक्स अफिसमा सुपरहिट भएको थियो । पहिलो चरणको देश दौडाहा सकिएपछि चलचित्रको दोस्रो चरणको देश दौडाहा सुरु हुनेछ । चलचित्रप्रति दर्शकलाई आकर्षित गर्न ‘परदेशी २’ले अपनाएको प्रचार शैलीलाई प्रशंसा गरिएको छ । 

मानकृष्ण महर्जनको छायांकन, बि.बि अनुरागी र नारायण रायमाझीको संगीत, रामजी लामिछाने र गोविन्द राईको कोरियोग्राफी रहेको चलचित्रमा अष्ट महर्जनको द्धन्द्ध, श्यामश्वेत रसाईलीको साउण्ड डिजाइन र मिक्सिङ, दीर्घ खड्काको सम्पादन छ ।